L’ejam de ladin

I ejams de ladin é gnüs metüs sö dl 1976 cun le D.P.R. n. 752 di 26.07.1976 en atuaziun de ci che é preodü dal Statut d’autonomia y vëgn fac dal 1977 incá.

I cater liví de conescënza dl lingaz dl ejam de ladin é: C1, B2, B1, A2. Ai ti corespogn ales conescënzes che vá debojëgn aladô dl titul de stüde por i profii profescionai dl'aministraziun publica. Por lauré tl’aministraziun publica tl Südtirol sön n post resservé al grup linguistich ladin mësson avëi l’atestat de trilinguism.

L'ejam de ladin é metü adöm da 4 proes: proa de comprenjiun tl ascuté sö, proa scrita, proa a usc y proa de comprenjiun. L'ejam de ladin pó gní fat te dui idioms: ladin de Gherdëna y ladin dla Val Badia.

Informaziuns d'öga sön l'ejam de ladin

Che?

Dötes les porsones interessades pó se scrí ite al ejam de ladin. L'amisciun al ejam de ladin n'é nia liada a n titul de stüde.

Sce an ó fá l’ejam de livel C1 y B2 mësson avëi 16 agn y sce an ó fá l’ejam de livel B1 y A2 mësson avëi 14 agn.

Co?

I podëis se scrí ite al ejam de ladin te vigni momënt online cun SPID o cun la cherta d’identité eletronica.

I podëis ma se scrí ite al ejam de un n livel. N iade che i ëis fat l'ejam podëise se scrí ite danü al medemo ejam o al ejam de n ater livel.

L’ejam de ladin é debann.

L’iscriziun online vare por vare.

Olá?

A Balsan tla via Garibaldi 14, tla pröma alzada sot tera.

Can?

I ejams de ladin vëgn fac plü o manco un n iade al mëis.

IMPORTANT: Sce i ne sciafiëis nia da fá l’ejam le de dé dant porvia de na maratia o porvia de rajuns de forza plü alta, podëise sburlé un n iade su la data dl ejam cherdan sö le numer 0471 414100 o ortian na e-mail a el@provinzia.bz.it y al ves gnará dé n termin nü.

Le termin mëss gní desdit y chël altamo trëi dis da laur dan l’ejam. Sce l’assënza ne vëgn nia lasciada alsavëi adora assá, ne pón nia plü fá l’ejam por sis mëisc alalungia.

La data dl ejam pó gní antizipada por tó pert a n concurs publich.

Le calënder di ejams vëgn lauré fora eletronicamënter aladô dl ordin cronologich dles iscriziuns, porchël depënn i tëmps da aspeté dal numer de porsones scrites ite por i singui liví. De plü informaziuns é da ciafé cherdan sö le 0471 414100 o tres e-mail a: el@provinzia.bz.it.

De plü informaziuns: Problems cun la data d’ejam

Resultat dl ejam

Le resultat dl ejam vëgn metü te trëi dis da laur te osc raiun personal de myCIVIS. Ince les valutaziuns dla comisciun d’ejam y l’atestat de presënza sará da ciafé iló.

Sce i orëis odëi na copia de osc laur d’ejam, podëise nes ortié na e-mail a el@provinzia.bz.it. Ortiesse para prëibel na copia de osta cherta d’dentité.
Cherdede sö naota le numer de telefon 0471 414100 o ortiesse na e-mail por fá fora n termin, sce i orëis n termin personal por ti ciaré al laur dl ejam.

L'atestat dl ejam de ladin

Sce i ëis passé l’ejam é osc atestat dl ejam de ladin tl format digital diretamënt te osc raiun personal de myCIVIS. Chësc documënt vel a livel iuridich ma tl format digital. I n’ëis nia plü bria da gní te nosc ofize a do l'atestat sön papier, ajache l’atestat digital é l’atestat original. L’atestat de ladin vel tres.

Te osc raiun personal de myCIVIS ciafëise da desćiarié ince le documënt cun la lista de düc i ejams de bilinguism che i ëis fat cina sëgn. Chiló ciafëise le PDF cun les indicaziuns che vá debojëgn por le download.