![[Link] Website - Provinzia autonoma de Bulsan - Südtirol](/css/img/APBZ_Logo_Website_DE_IT_LAD.svg){kind=logo}
Evënc d'informaziun
Orëise odëi sciöche l'ejam de bilinguism ciara fora?
Simulaziun dla proa scrita y a usc, presentaziun dl ejam y consëis sön co s’arjigné ca al ejam.
Te nosta sënta di ejams de bi- y trilinguism a Balsan, tla via Garibaldi 14, organisunse de plü iadi al ann le "De dl bilinguism" cun le Zënter Cultural Trevi/Zënter Multilingual de Balsan. Ara se trata de evënc d’informaziun sön l'ejam de bilinguism cun simulaziuns alternades de proes scrites y a usc.
- Presentaziun te dui lingac dl ejam de bilinguism: al vëgn descrit tl detai la prozedöra, la strotöra y i contignüs dl ejam. Implü ciafëise tröc consëis d'öga.
- Simulaziun cun feedback dla comisciun d'ejam: les simulaziuns dl ejam scrit y a usc vëgn proponüdes baratan jö. Chësc conzed da porvé fora personalmënter tramesdöes les proes d'ejam.
- S'arjigné ca al ejam y imparé autonomamënter n lingaz: les porsones interessades podará conësce tratan l'evënt i stromënc y i materiai a desposiziun por s'arjigné ca le miú che ara vá al ejam de bilinguism y por imparé autonomamënter n lingaz ince por merit dles tecnologies nöies. Le personal dl Zënter Cultural Trevi/Zënter Multilingual de Balsan mostrará cares che é les poscibilités de preparaziun debann.
Descuride i formac dl de dl bilinguism
Simulaziun dla proa scrita
I scriarëis n tema sön n argomënt dé dant por talian o todësch, che gnará ciaré jö dala comisciun. Do la coreziun ciafarëise n feedback sön osc ejam scrit tratan n colloquium de 10 menüc.
Por mirit dla coreziun y dl feedback individual, podarëise descurí üsc punc de forza y de deblëza tla produziun dl test scrit, a chësta moda podarëise s'arjigné ca le miú che ara vá al dërt ejam scrit.
Tratan che al vëgn fat la coreziun podarëise tó pert ala presentaziun dl ejam y ciafé consëis sön co s’arjigné ca al ejam y sön co imparé autonomamënter.
Simulaziun dla proa a usc
Al é n’ocajiun por podëi savaié da fá l'ejam a usc y ciafé atira n feedback da pert dla comisciun d'ejam. Implü podarëise tó pert a simulaziuns de d'atres porsones.
I arëis a desposiziun 10-15 menüc por arjigné ca l'argomënt trat fora y spo fajarëise l'ejam a usc.
La comisciun d'ejam ves lasciará atira alsavëi sciöche ara é jüda mostran sö üsc punc de forza y ostes deblëzes y ves aconsiará coche i podëis mioré.
Ia por le de podarëise tó pert ala presentaziun dl ejam de bilinguism y ciafé consëis sön la preparaziun spezifica al ejam y sön l’autoaprendimënt.
Ultimo ajornamënt: 02/10/2025