Ejam de ladin: Comisciun nöia da jená dl 2025 inant

Le Comissariat dl Govern á nominé 9 ejaminadësses y ejaminadus por l’azertamënt dla conescënza dl lingaz ladin por i agn 2025-2029.

En mercui, ai 4 de dezëmber dl 2024, él gnü publiché tl Boletin Ofizial le decret dl Comissar dl Govern di 28 de novëmber dl 2024, n. 50814, sön la nominaziun di comëmbri y dles comëmbres dla Comisciun d'ejam por l’azertamënt dla conescënza dl lingaz ladin por i agn 2025-2029 y l‘aprovaziun di criters por la valutaziun y l'azertamënt dla conescënza di lingac talian, todësch y ladin.

Por ciafé tl'aministraziun publica dl Südtirol n post resservé al grup linguistich ladin, mësson avëi sides l’atestat de bilinguism che l’atestat de ladin.

Ajache le mandat dles comëmbres y di comëmbri dla Comisciun dl ejam de ladin da sëgn toma ala fin dl ann, él gnü metü a jí de setëmber dl 2024 na prozedöra de seleziun por la nominaziun di comëmbri y dles comëmbres por i agn 2025-2029, che é sëgn gnüda stlüta jö cun la seleziun di componënc dla Comisciun: al é gnü nominé 9 ejaminadësses y ejaminadus, 5 por l'idiom de Gherdëna y 4 por chël dla Val Badia. Les comisciuns nöies mët man so laur de jená dl 2025.