“Lingaz é aventöra”: al é pié ia la campagna sön le plurilinguism 

Dai 30 de jügn inant á la Provinzia metü a jí na campagna d'informaziun nöia por promöie le plurilinguism y oje l'atenziun sön l’oferta formativa tl ciamp linguistich.

La campagna dess ince valorisé i atestac de bilinguism y de ladin, recuisic fondamentai por ti rové pormez al laur tl setur publich tl Südtirol.

Le slogan “Todësch, talian, ladin. Trëi lingac te un n raiun” ó mostré sö le valur dl plurilinguism tl Südtirol y dé inant le messaje che investí tla conescënza di trëi lingac provinziai ó dí investí tl dagní. Cun l’hashtag #multilingual fej la campagna referimënt ala gran oferta de cursc y scomenciadies por l’aprendimënt linguistich, che tol ince ite chi ponsá por s'arjigné ca al ejam de bilinguism. L'obietif é da incorajé deplü porsones a fá l’ejam s’arjignan ca bun y odëi ite i vantaji profescionai che vëgn da avëi l'atestat.

Dl 2024 s'á 10.660 porsones scrit ite al ejam de bilinguism y de ladin y passa 15.000 porsones á tut pert a cursc finanziá dala Provinzia: todësch y talian sciöche secundo lingaz, alfabetisaziun, lingaz di sëgns y cursc de inglesc, franzesc, spagnol, rus, arab, cinesc y tröc d'atri lingac. Danter chi plü damaná él ince i percursc de coaching linguistich y i cursc spezifics por fá l'ejam de bilinguism.

L’oferta por dötes les etés prevëiga ativités realisades ince por mirit dl contribut dl Fonds sozial europeich che tol ite consulënzes personalisades tl Zënter Multilingual de Balsan y tla Mediateca Multilinguala de Maran.

Informaziuns sön les ofertes linguistiches cun links, consëis y documentaziun é da ciafé sön le sit dla Provinzia ala misciun https://lingue.provincia.bz.it/it/home