I ejams de bilinguism y de ladin se trasferësc!

Dai 25 setëmber dl 2025 inant, gnará i ejams de bilinguism y de ladin fac tla sënta nöia dl Sorvisc Ejams de bi- y trilinguism, tla via Garibaldi 14 a Balsan.

Trasferimënt tl frabicat nü dl Walther-Park

Ala fin de setëmber traslochëia le Sorvisc de bi- y trilinguism ti locai nüs tla via Garibaldi 14. Por rajuns organisatives y logistiches ne sarál degügn ejams dai 18 ai 24 de setëmber.

I locai por i ejams é tla pröma alzada sot tera dl frabicat nü y pîta condiziuns otimales por ci che reverda la climatisaziun y l’acustica. A pert le salf d’aspeta él a desposiziun cater salfs por i ejams cun atrezadöres tecniches modernes, che fej a na moda che les lercs sides adatades ince a evënc organisá regolarmënter dal Sorvisc Ejams de bi- y trilinguism, sciöche le "De dl bilinguism" cun simulaziuns d’ejam y presentaziuns. I ofizi dl personal deperpo é tla pröma alzada.
La direturia Karin Ranzi é contënta dla sistemaziun nöia, ajache sëgn é dötes les unités organisatives dl Ofize Lingac ofiziai y dërc zivics, chël ó dí le Sorvisc por les ëres y le Sorvisc Ejams de bi- y trilinguism, tla medema ciasa: "La vijinanza fisica favorësc la colaboraziun, sides dal punt d'odüda logistich y dla gestiun dl tëmp, co por le barat personal important da vigni de che influenzëia positivamënter le clima de laur.”

I pröms ejams tla sënta nöia

Ai 25 de setëmber tol indô sö le Sorvisc Ejams de bi- y trilinguism süa ativité d’ejam tla sënta nöia. Ti locai d’ejam röion dal’entrada prinzipala tla via Garibaldi. Sciöche denant podará ite les candidates y i candidac bele dales 8:00 inant.
Le Sorvisc Ejams de bi- y trilinguism pón cherdé sö ai numeri de telefon 0471/413900 y 0471/414100 : lönesc, mertesc, mercui y vëndres: dales 9:00 ales 12:00 y jöbia: dales 8:30 ales 13:00 y dales 14:00 ales 17:30. Sce an á debojëgn da jí dal Sorvisc Ejams de bi- y trilinguism mësson tó n termin.
Claudia Picus, coordinadëssa dl Sorvisc Ejams de bi- y trilinguism sotrissëia l’importanza dla posiziun zentrala dla sënta nöia: "Al vëgn garantí inant la posiziun daimpró dala staziun dla ferata y di bus. Dala staziun röion ca te püc menüc a pe. Chësc ti conzed ales porsones che tol pert ai ejams, che vëgn da düc i raiuns dla provinzia, sciöche ince da defora dla provinzia, da adoré i mesi publics por rové adalerch. Implü él atira dailó incëria tröpes plazes da parché publiches por che che vëgn adalerch cun l'auto."