Suzes por le proiet pilot “Edema di ejams de bilinguism” dedicada ales scores

Al s'á stlüt jö cun na gran partezipaziun l'“Edema di ejmas de bilinguism” dedicada ales classes dles scores altes y promoiü dal Sorvisc Ejams de bi- y trilinguism en colaboraziun cun les trëi Intendënzes todëscia, taliana y ladina.

La scomenciadia pilota, che é gnüda metüda a jí dai 4 ai 8 de ma dl 2026 tla sënta da Balsan, á revardé studentësses y studënc dles scores altes dla Provinzia, ti pitan la poscibilité da fá i ejams de bilinguism adöm cun süa classa y gní acompagná dal personal insegnant. I ejams é gnüs tignis cun les prozedöres y cun i tëmps standard.

L’interes por le proiet é sté dal scomenciamënt inant dër gran: les domandes de partezipaziun á superé la cuota de 1.000 cun feter zirca 300 posć danman. Indöt ál tut pert 260 candidates y candidac de passa 20 scores altes dl Südtirol danter lizeums, istituc tecnics, economics y profescionai.

Val' dac sön l’andamënt dl'edema:

• 149 s'á scrit ite al ejam de livel B2;
• 99 s'á scrit ite al ejam de livel B1;
• 12 candidates y candidac dles scores ladines á fat l'ejam de livel C1;
• 128 candidades y candidac á passé l’ejam, arjunjon insciö na porcentuala de suzes complessiva de feter le 50%.

La scomenciadia á rapresenté n’ocajiun importanta por avijiné les studëntes y i studënc al ejam de bilinguism, che costituësc n'alternativa varënta ai zertificac linguistics y conzed da atesté te n su de la conescënza di lingac talian y todësch. L’ejam é debann, an pó le fá tan de iadi che an ó y al vel por tres. L'atestat de bilinguism ti corespogn ai liví A2, B1, B2 y C1 dl Cheder de referimënt europeich en comunanza por i lingac (CRECL). Pro l’ejam vëgnel valuté dötes cater les competënzes linguistiches - comprenjiun dl scrit, comprenjiun da ascuté sö, produziun scrita y produziun a usc - avisa sciöche al vëgn fat pro i zertificac linguistics internazionai prinzipai.

Le proiet á ince favorí na colaboraziun danter scores y aministraziun provinziala, promoion l’azes ai ejams y cherian n contest dediché y motivant por les classes che á tut pert. Chësta colaboraziun se respidlëia ince te d'atres scomenciadies: d'altonn organisëia le Sorvisc Ejams en colaboraziun cun le Zënter Multilingual, sciöche bele da n valgügn agn incá, n webinar de formaziun por le personal dozënt de talian y todësch L2. Le fin é pité informaziuns y stromënc de preparaziun al ejam por les studëntes y i studënc tres l’esperiënza profescionala, ejëmpli pratics y consëis da pert de ejaminadësses y ejaminadus. Al tol ince pert les colaboradësses dl Zënter Multilingual che presentëia les ressurses y i sorvisc dl zënter.